Entertainment: Society

Showing posts with label Society. Show all posts

តើប្រទេសកម្ពុជាមានអំពើពុករលួយកម្រិតណា?

កាលពីប៉ុន្មានថ្ងៃកន្លងទៅនេះមូលនិធិសកល(Global Fund) ដែលជាម្ចាស់ជំនួយដ៏ធំមួយសម្រាប់ប្រទេសកម្ពុជាបានបញ្ចេញរបាយការណ៍មួយដែលទាក់ទងនឹងអំពើពុករលួយនៅប្រទេសកម្ពុជាចំពោះស្ថាប័នពីរដែលស្ថិតនៅក្រោមក្រសួងសុខាភិបាលគឺមជ្ឈមណ្ឌលជាតិប្រយុទ្ធនឹងជំងឺគ្រុនចាញ់និងមជ្ឍមណ្ឌលជាតិប្រយុទ្ធនឹងជំងឺអេដស៍ សើស្បែកនិងកាមរោគ ។ អំពើពុករលួយនេះត្រូវបានរកឃើញដោយស្ថាប័នឯករាជមួយឈ្មោះថាThe Global Fund’s Office of the Inspector General គឺជាអំពើពុករលួយដែលទាក់ទងនឹងកំរៃជើងសារ (Commission) ដែលធ្វើឡើងរវាងស្ថាប័នទាំង២ខាងលើជាមួយនឹងស្ថាប័នផ្គត់ផ្គង់មុងជ្រលក់ថ្នាំ ក្នុងទឹកប្រាក់សរុបចំនួន៤១០,០០០ដុល្លាអាមេរិក ។ មានន័យថាស្ថាប័នដែលជាអ្នកផ្គត់ផ្គង់(អ្នកលក់)មុងជ្រលក់ថ្នាំនេះត្រូវបង់ថ្លៃកំរៃជើងសារទៅឱ្យមន្ត្រីរដ្ឋាភិបាលដើម្បីបានប្រយោជន៍ជាការបន្តកិច្ចសន្យាក្នុងការទិញផលិតផលរបស់ខ្លួនតទៅទៀត ។ ពត៌មាននេះបានធ្វើឱ្យមានការភ្ញាក់ផ្អើលដល់មជ្ឍដ្ឋាននានាទាំងជាតិនិងអន្តរជាតិ ប៉ុន្តែមានមនុស្សមួយចំនួនហាក់ដូចជាមិនមានការភ្ញាក់ផ្អើលអ្វីឡើយដោយពួកគេយល់ថា នេះគឺជារឿងធម្មតាទៅហើយនៅក្នុងសង្គមខ្មែរ ព្រោះអំពើពុករលួយនេះគ្រាន់តែជាអំពើពុករលួយមួយក្នុងចំណោមអំពើពុករលួយជាច្រើនស្ទើររាប់មិនអស់នៅក្នុងប្រទេសមួយនេះ ។ រដ្ឋាភិបាលបានបង្កើតអង្គភាពប្រឆាំងនឹងអំពើពុករលួយមួយដើម្បីបង្ហាញអំពីឆន្ទៈរបស់ខ្លួនថាចង់កំចាត់អំពើពុករលួយដែរក៏ប៉ុន្តែអំពើពុករលួយហាក់ដូចជាគ្មានការថយចុះឡើយ ។

អង្គការតម្លាភាពអន្តរជាតិ (Transparency International Organization) បានធ្វើអង្កេតប្រចាំឆ្នាំរបស់ខ្លួននៅក្នុងឆ្នាំ២០១២លើប្រទេសនានាលើពិភពលោកស្តីអំពីអំពើពុករលួយ ។ អង្គការនេះបានរកឃើញថាប្រទេសដែលពុករលួយខ្លាំងជាងគេចំនួន៣គឺ សូមាលី កូរេខាងជើងនិងអាហ្វហ្គានីស្ថានដែលប្រទេសទាំង៣នេះបានពិន្ទុៈCPI ៨ស្មើគ្នា (CPI: Corruption Perception Index) ។បើពិន្ទុៈនេះកាន់តែតូចមានន័យថាប្រទេសនោះមានអំពើពុករលួយកាន់តែខ្លាំង ។ ចំណែកឯប្រទេសដែលមានអំពើពុករលួយតិចជាងគេបំផុតគឺប្រទេសហ្វាំងឡង់ ដាណឺម៉ាក និងញូវហ្សេឡិនដែលមានពិន្ទុៈCPI ដល់ទៅ៩០ដូចគ្នា ។ រីឯប្រទេសកម្ពុជាយើងវិញបានពិន្ទុៈCPI ២២ ហើយជាប់ចំណាត់ថ្នាក់ទី១៨ផ្នែកអំពើពុករលួយ ។ សូមមើលតារាងចំណាត់ថ្នាក់នៃការធ្វើអង្កេតប្រចាំឆ្នាំ២០១២របស់អង្គការតម្លាភាពអន្តរជាតិខាងក្រោមៈ

ប្រជាជនខ្មែរបានដឹងថាអំពើពុករលួយបានកើតមានស្ទើរតែគ្រប់ទីកន្លែងនិងគ្រប់ទិដ្ឋភាពនៃជីវិតប្រចាំថ្ងៃរបស់ពួកគេ ដូចជាការសូកប៉ាន់ប៉ូលីសចរាចរណ៍ ការធ្វើប័ណ្ណបើកបរ ការធ្វើលិខិតស្នាមផ្សេងៗ ឱ្យគ្រូពេទ្យដើម្បីឱ្យពួកគេយកចិត្តទុកដាក់ព្យាបាលជំងឺ ការសូកប៉ាន់តុលាការជាដើម ។ល។

ផែនទីខាងក្រោមបង្ហាញអំពីកម្រិតអំពើពុករលួយនៃប្រទេសនិមួយៗក្នុងពិភពលោកក្នុងឆ្នាំ២០១២ ។

អត្ថបទ: KSN, Ref: Global Fund, Transparency International, The Rich, Wikipedia

ប្រទេសទាំង១០ដែលមានគ្រោះថ្នាក់ចរាចរណ៍ច្រើនជាងគេ

គ្រោះថ្នាក់ចរាចរណ៍មួយនៅកម្ពុជាដែលបង្កឱ្យមនុស្សស្លាប់

នៅប្រទេសកម្ពុជានរណាក៏ដឹងដែរថាគ្រោះថ្នាក់ចរាចរណ៍កើតមានរាល់ថ្ងៃនិងស្ទើរគ្រប់ទីកន្លែងដែលបង្កឱ្យមានមនុស្សស្លាប់និងរបួសរាប់ពាន់នាក់ក្នុងមួយឆ្នាំៗ ។ យោងតាមរបាយការណ៍របស់អង្គការសុខភាពពិភពលោកអ្នកដែលបានបាត់បង់ជីវិតនៅក្នុងគ្រោះថ្នាក់ចរាចរណ៍មានជាង២០០០នាក់នៅក្នុងឆ្នាំ២០១០ ។ គ្រោះថ្នាក់ចរាចរណ៍ភាគច្រើនបណ្តាលមកពីការមិនគោរពច្បាប់ចរាចរណ៍ដូចជាការបើកបរនៅពេលស្រវឹង ការបើកបរលើសល្បឿនកំណត់ ការមិនគោរពភ្លើងស្តុបនិងស្លាកសញ្ញាចរាចរណ៍ជាដើម។ ទោះបីជាមានការប្រឹងប្រែងទប់ស្កាត់គ្រោះថ្នាក់នេះពីបណ្តាស្ថាប័នរដ្ឋ ឯកជននិងអង្គការក្រៅរដ្ឋាភិបាលក្តីក៏គ្រោះថ្នាក់ចរាចរណ៍នៅប្រទេសកម្ពុជាមិនបានថយចុះឡើយ ។ ប្រជាជនខ្មែរប្រាកដជាមានចម្ងល់ថាចុះនៅប្រទេសដទៃមានគ្រោះថ្នាក់ចរាចរណ៍ដូចប្រទេសយើងដែរឫុទេ? Khmer Science News សូមលើកយកតួលេខគ្រោះថ្នាក់ចរាចរណ៍នៃប្រទេសចំនួន១០ដែលស្ថិតនៅលំដាប់លើគេមកបង្ហាញជូន។ ក្នុងមួយឆ្នាំៗមានមនុស្ស១.៣លាននាក់ក្នុងពិភពលោកស្លាប់ដោយសារគ្រោះថ្នាក់ចរាចរណ៍ ប៉ុន្តែមានប្រទេសចំនួន១០ ដែលបង្កឱ្យមានពាក់កណ្តាលនៃចំនួនអ្នកស្លាប់នេះ គឺលើសពី៦សែននាក់ក្នុងមួយឆ្នាំៗ។

ចំនួនអ្នកស្លាប់ដោយគ្រោះថា្នក់ចរាចរណ៍ជាមធ្យមក្នុងមួយឆ្នាំ (Washington Post)

១. ប្រទេសចិនៈ ២២០,០០០នាក់
២. ប្រទេសឥណ្ឌាៈ ១៩០,០០០នាក់
៣. ប្រទេសរុស្សីៈ ៣៥,០០០នាក់
៤. ប្រទេសប្រេស៊ីលៈ ៣៥,០០០នាក់
៥. ប្រទេសអេហ្ស៊ីបៈ ៣១,០០០នាក់
៦. ប្រទេសមិកស៊ិកៈ ២២,០០០នាក់
៧. ប្រទេសវៀតណាមៈ ១៤,០០០នាក់
៨. ប្រទេសកេនយ៉ាៈ ១២,០០០នាក់
៩. ប្រទេសទួរគីៈ ១០,០០០នាក់
១០. ប្រទេសកម្ពុជាៈ ១,៧០០នាក់

ទោះបីជាប្រទេសកម្ពុជាមានចំនួនស្លាប់ដោយគ្រោះថ្នាក់ចរាចរណ៍តិចជាងគេក្នុងចំណោមប្រទេសទាំង១០ក៏ដោយ ក៏ប៉ុន្តែបើយើងប្រៀបធៀបជាមួយនឹងចំនួនប្រជាជនយើងឃើញថាប្រទេសយើងមានចំនួនប្រជាជនតិចជាងគេដូចច្នេះបើគិតអត្រាស្លាប់ជាភាគរយឫជាអត្រាស្លាប់លើ១០០,០០០គឺប្រទេសយើងមានអត្រាស្លាប់មិនទាបជាងគេប៉ុន្មានទេ។ យោងតាមប្រភពពត៌មានCharts Bin អត្រាស្លាប់ដោយគ្រោះថ្នាក់ចរាចរណ៍តាមប្រទេសនៅឆ្នាំ២០០៧មានដូចតទៅៈ

១. ប្រទេសEritrea: ៤៨.៤នាក់លើ១០០,០០០ (០.០៤៨%)
២. ប្រទេសអេហ្ស៊ីបៈ ៤១.៦នាក់លើ១០០,០០០ (០.០៤១%)
៣. ប្រទេសLibyan Arab Jamahiraya: ៤០.៥នាក់លើ១០០,០០០ (០.០៤០%)
៤. ប្រទេសអាហ្វហ្គានីស្ថានៈ ៣៩នាក់លើ១០០,០០០ (០.០៣៩%)
៥. ប្រទេសអ៊ីរ៉ាក់ៈ ៣៨.១នាក់លើ១០០,០០០ (០.០៣៨%)
៦. ប្រទេសNiger: ៣៧.៧នាក់លើ១០០,០០០ (០.០៣៧%)
៧. ប្រទេសអង់ហ្គោឡាៈ ៣៧.៧នាក់លើ១០០,០០០ (០.០៣៧%)
៨. ប្រទេស United Arab Emirates: ៣៧.១នាក់លើ១០០,០០០នាក់ (០.០៣៧%)
៩. ប្រទេសអ៊ីរ៉ង់ៈ ៣៥.៨នាក់លើ១០០,០០០ (០.០៣៥%)
១០. ប្រទេសកម្ពុជាៈ ១២.១នាក់លើ១០០,០០០ (០.០១២%)

សូមបញ្ជាក់ថាប្រទេសកម្ពុជាមិនជាប់ចំណាត់ថ្នាក់លើគេក្នុងចំណោមប្រទេសទាំង១០ដែលមានអត្រាស្លាប់ខ្ពស់ជាងគេនោះទេ ប៉ុន្តែយើងសូមលើកយកតួលេខមកបង្ហាញដើម្បីឱ្យអ្នកអានបានប្រៀបធៀបជាមួយប្រទេសដទៃ ។ ប៉ុន្តែទោះជាយ៉ាងណាក៏ប្រទេសកម្ពុជានៅតែជាប់ចំណាត់ថ្នាក់ក្នុងចំណោមប្រទេសទាំង១០ដែលមានចំនួនមនុស្សស្លាប់ដោយគ្រោះថ្នាក់ចរាចរណ៍ច្រើនជាងគេដែរ ។ ដូច្នេះមានតែប្រជាជនខ្មែរយើងទាំងអស់គ្នាទេដែលត្រូវរួមគ្នាកាត់បន្ថយគ្រោះថ្នាក់ចរាចរណ៍នេះបាន ដើម្បីកុំឱ្យជាប់ចំណាត់ថ្នាក់នៅក្នុងប្រទេសទាំង១០ដែលមានចំនួនអ្នកស្លាប់ដោយគ្រោះថ្នាក់ចរាចរណ៍ច្រើនជាងគេនេះតទៅទៀត ។

អត្ថបទ: KSN Team, Ref: Washington Post, WHO and Charts Bin

តើសុភមង្គលជាអ្វី? What Is Happiness?

នៅលើលោកនេះមានមនុស្សមួយចំនួនបានគិតថាមានលុយច្រើនគឺពិតជាមានសុភមង្គលជាមិន ខានពីព្រោះលុយអាចទិញអ្វីៗបានគ្រប់យ៉ាង។ ប៉ុន្តែយោងតាមការសិក្សាស្រាវជ្រាវអំពី សុភមង្គល «លុយ»មិនមែនជាកត្តាតែមួយគត់ដែលនាំអោយមានសុភមង្គលនោះទេ គឹចាំបាច់ត្រូវមានកត្តា ផ្សេង ជាច្រើនទៀតរួមផ្សំដែលលុយមិនអាចទិញបាន។

អ្នកសិក្សាស្រាវជ្រាវបានកំណត់និយមន័យរបស់សុភមង្គលថា ការទទួលអារម្មណ៍ល្អ រួមមានភាព សប្បាយរីករាយ មោទនភាព និងការដឹងគុណ(Gratitude) ។ ប៉ុន្តែមានអ្នកសិក្សាស្រាវជ្រាវខ្លះបាន អោយនិយមន័យសុភមង្គលថា «សុខុមាលភាព» ដែលអ្នកស្រាវជ្រាវទាំងនោះតែងតែសាកសួរអ្នក ដែលត្រូវសម្ភាសន៍អោយរាយការណ៍អំពីកម្រិតនៃការពេញចិត្តចំពោះជីវិតរបស់ពួកគេផ្ទាល់ និង កម្រិតនៃការទទួលអារម្មណ៍ល្អនិងមិនល្អដែលពួកគេធ្លាប់មានបទពិសោធន៍ក្នុងជីវិត។

នៅក្នុងសៀវភៅស្រាវជ្រាវអំពី សុភមង្គលបោះពុម្ភឆ្នាំ២០០៧របស់អ្នកស្រី Sonja Lyubomirsky ដែលជាអ្នកស្រាវជ្រាវខាងចិត្តសាស្ត្របានបកស្រាយថាសុភមង្គលគឺជាបទពិសោធន៍នៃការ សប្បាយរីករាយ មានសុខុមាលភាព រួមផ្សំជាមួយ នឹងភាពល្អប្រសើរ មានអត្ថន័យ និងភាពមាន ប្រយោជន៍នៃជីវិត។ចំណែកនៅក្នុងគេហទំព័រGreater Good ពាក្យសុភមង្គលត្រូវបាន អោយ និយមន័យថាជាការទទួលអារម្មណ៍ល្អដែលរួមផ្សំជាមួយភាពរីករាយ ភាពទទួលបាននូវអត្ថន័យ និងគោលដៅនៃជីវិត។

ខាងក្រោមនេះគឺជាកត្តាសំខាន់ៗដែលអ្នកសិក្សាស្រាវជ្រាវបញ្ជាក់ថាវាទាក់ទងនឹងសុភមង្គលៈ

១-មានសុខភាពល្អគឺមានសុភមង្គល

២-មានទំនាក់ទំនងល្អ ភាពចុះសម្រុងក្នុងគ្រួសារនិងសង្គម (មានគូស្វាមីភរិយាល្អ មានមិត្តភ័ក្រ្តល្អ)

៣-រកប្រាក់ចំណូលបានច្រើន និងការងារមានភាពរីកចម្រើន

៤-មនុស្សដែលមានលទ្ធភាពអាចទប់ទល់ជាមួយនឹងStress និងការប៉ះទង្គិចផ្លូវចិត្ត (Trauma)

៥-មានចិត្តទូលាយ និងសប្បុរស

៦-មនុស្សដែលសប្បាយរីករាយគឺជាមនុស្សដែលមានគំនិតច្នៃប្រឌិត និងមើលឃើញគ្រប់ជ្រុង ជ្រោយ។

តើអ្នកមាន៦ចំណុចនេះហើយឬនៅ?

ប្រែសម្រួលៈ KSN Team Ref: Greater Good Website

Pages

តើប្រទេសកម្ពុជាមាន​អំពើពុករលួយកម្រិតណា?

ប្រទេសទាំង១០​ដែល​មាន​គ្រោះ​ថ្នាក់​ចរាចរណ៍​ច្រើន​ជាង​គេ​

តើសុភមង្គលជាអ្វី? What Is Happiness?

តើប្រទេសកម្ពុជាមានអំពើពុករលួយកម្រិតណា?

ប្រទេសទាំង១០ដែលមានគ្រោះថ្នាក់ចរាចរណ៍ច្រើនជាងគេ