បច្ចុប្បន្ននេះការប្រើប្រាស់ប្រព័ន្ធGPS មានកាន់តែច្រើនឡើងៗ ដូចជាការប្រើប្រាស់នៅក្នុងរថយន្ត ដើម្បីបង្ហាញផ្លូវ ការប្រើប្រាស់ជាឧបករណ៍សម្រាប់វាស់ប្លង់ដី វាស់ព្រំដែន និងប្រើប្រាស់ក្នុងទូរស័ព្ទ ដៃផងដែរ។ ការប្រើប្រាស់GPSមានប្រយោជន៍សម្រាប់តាមដាននូវទីតាំងរបស់យានយន្តឬមនុស្ស ក្នុងពេលជាក់ស្តែងដោយរួមមានការតាមដានកុមារ ឧក្រិដ្ឋជន ប៉ូលីស រថយន្តសង្រ្គោះបន្ទាន់ និង រកទីតាំងនៅលើផែនទីជាដើម។
GPS ជាពាក្យបង្រួញរបស់ពាក្យ Global Position System (ប្រព័ន្ធបង្ហាញទីតាំងជាសកល)។ GPS មានដំណើរការបានដោយសារផ្តាយរណបដែលផ្តល់នូវទីតាំង និងពត៌មានអំពីលក្ខខ័ណ្ឌអាកាស ធាតុនៅលើផែនដី ឬនៅក្បែរផ្ទៃផែនដី។ ប្រព័ន្ធនេះត្រូវបានគេយកទៅប្រើប្រាស់នៅក្នុងការងារ យោធា ស៊ីវិល និងពាណិជ្ចកម្មទូទាំងពិភពលោក។ សូមបញ្ជាក់ថាប្រព័ន្ធGPS នេះគ្រប់គ្រងដោយ រដ្ឋាភិបាលសហរដ្ឋអាមេរិក ប៉ុន្តែប្រព័ន្ធនេះផ្តល់នូវការប្រើប្រាស់ដោយសេរីចំពោះអ្នកដែលមាន ឧបករណ៍ទទួលGPS (GPS receiver)។
គម្រោងបង្កើត GPS ត្រូវបានធ្វើឡើងនៅឆ្នាំ១៩៧៣ ដើម្បីសម្រេចអោយបាននូវប្រព័ន្ធបង្ហាញផ្លូវមួយដែលប្រសើរជាងមុនដោយរួមផ្សំជាមួយនឹងគំនិតអ្នកវិទ្យាសាស្ត្រជំនាន់មុនជាច្រើននាក់ និងការសិក្សាស្រាវជ្រាវចាប់តាំងពីទស្សវត្សរ៍១៩៦០មក។ GPSជាដំបូងឡើងត្រូវបានប្រតិបត្តិការ ដោយផ្កាយរណបចំនួន២៤ ហើយវាត្រូវបានដំណើរការពេញលេញនៅឆ្នាំ១៩៩៤។ ដោយមាន បច្ចេកវិជ្ជាទំនើបនិងតម្រូវការថ្មីៗលើប្រព័ន្ធដែលមានស្រាប់ អ្នកវិទ្យាសាស្ត្រកំពុងតែផលិតនូវ ប្រព័ន្ធ GPSជំនាន់ថ្មីមួយទៀតគឺGPS III និងOperational Control System (OCS)។ នៅឆ្នាំ២០០០ សហរដ្ឋអាមេរិកបានធ្វើសមាជមួយដើម្បីធ្វើអោយកិច្ចប្រឹងប្រែងលើការងារGPS III មានលក្ខណៈជា ផ្លូវការ។
ក្រៅពីប្រព័ន្ធGPSរបស់អាមេរិក ប្រទេសរុស្សីបានផលិតដំណាលគ្នានូវប្រព័ន្ធស្រដៀងគ្នានេះដែរដែលមានឈ្មោះថា The Russian Global Navigation
Satellite System (GLONASS) ប៉ុន្តែហាក់ដូច ជាបរាជ័យដោយសារតែប្រព័ន្ធនោះមិនអាចគ្របដណ្តប់លើផែនដីទាំងមូលបានទេនៅពេលដំបូង លុះដល់ពាក់កណ្តាលទស្សវត្សរ៍ឆ្នាំ២០០០ទើបអាចសម្រេចបាន។ ក្រៅពីនោះមានប្រព័ន្ធស្រដៀង គ្នានេះដែរដែលបង្កើតឡើងដោយសហគមន៍អឺរ៉ុបដែលមានឈ្មោះថាGalileo Positioning System។ ចំណែកប្រទេសចិនឯណោះវិញក៏បានបង្កើតនូវប្រព័ន្ធមួយមានឈ្មោះថា Compass Navigation System ឯប្រទេសឥណ្ឌាវិញបង្កើតប្រព័ន្ធដែលមានឈ្មោះថា Indian Regional Navigation
Satellite System។
